يندرج تحت تصنيف : استراحة الأحد — yawWAR at 1:13 م on الأحد, أغسطس 3, 2008
حتى لا ننسى هذا اليوم .. وحتى يعرفه صغارنا ..
سنظل نذكر ذكرى الغزو الغاشم في الثاني من كل اغسطس ..
عندما اجتاحت القوى العراقية الصدامية الغادرة ارض الكويت ..
سأترككم مع مجموعه منتقاه من المقاطع .. حتى لا ننسى
تلفزيون الكويت باداره عراقيه اثناء الاحتلال
المذيع يوسف مصطفى في تلفزيون الكويت من السعودية أثناء الغزو
اغنية كسروا اللعبه الجديده
تصوير منزلي لاحد نساء الكويت اثناء الغزو .. شوفوا الحياة
التحرير
اغنية انا كويتي
الله لا يعودها من ايام ..
والله يرحم شهداءنا الابرار .. ويرحم شخينا جابر وشيخنا سعد ..
يندرج تحت تصنيف : استراحة الأحد — yawWAR at 9:23 م on الأحد, يوليو 27, 2008
قسم جديد في نتنوت اتمنى ان يحوز على اعجابكم .. وهو عبارة عن موضوع اسبوعي منوع .. كل يوم احد !
ليش الأحد ؟
لان الاحد اول يوم بالاسبوع .. وهو اطول يوم وغصب يخلص .. ودايما يبدأ اول ما تطلع من البيت وتشغل الاذاعة وتسمع البرامج السخيفه واصوات المذيعين اللي تنرفز .. بين مارينا اف ام و كويت اف ام ..
تسمع المذيعة نوف في مارينا اف ام اللي وايد مثالية وعشان تقول الجمله يبيلها ٣ دقايق تخليك تنتقل الى كويت اف ام تنطر اغنية لكن تفاجئك مذيعة اخرى تحاول تنكت بس مو متوفقه بقطاتها و مذيع صوته خشن جنه كان نايم بالاستيديو قيل لا يبدا البرنامج .. وتستقر اخيرا على محطة الغناء القديم .. تسمع شي يعدل مزاجك من الصبح !
واذا ييت الظهر تسمع الديوانية ، وتمسع ضحكة الياقوت على كل شي جنه قاعد بقهوه والانصاري بس يقعد ينصح الشباب .. و ..
على طاري الانصاري .. هذا فيديو شفته بمدونه Frankom
كفوو كفوو .. ولد فلوس و مو هامك شي ..
فعل غريب .. مو لايق عليه .. بس الله يساعده !
عالاقل جان خلاه واستفاد منه بشكل اخر !
في مشكله عندنا بالمذيعين .. لان الكل صار مذيع واعلامي .. حتى الممثلين صاروا مذيعين و يقدمون برامج والمذيعين قاموا يمثلون والصحافيين اتجهوا الى الغناء والشعراء صاروا مذيعين والمغنيين صاروا ملحنين وشعراء ..
بس الوحيد اللي صاد الحركة .. فنان صار ارهابي ..
الحبيب رايح يجاهد مع ناس ما يدري شنو نشاطهم .. و يقول “معقوله انا فنان و افكر اقتل !”
دام ليلحين تعتبر نفسك فنان انا اقول رد عالاغاني وايد ابرك من الارهاب !
انا استغرب ان يوم الاحد طويل جذيه مع ان فيه ٢٤ ساعة نفس باجي الايام .. بس بعد الدراسه والتفكير .. تبين لنا ان الساعة الوحده فيها ٨٠ دقيقة بدل ٦٠ !
المشكله الوقت الطويل يؤدي الى الملل .. والفراغ .. وهذا احد صحايا الاحد
انشالله يكون خفيف عليكم اليوم .. ويعدي بسرعة ..
اما نصايحي حق اللي يبي يضيع وقته بشي مفيد ..
اما ان يشيش
او ان يشرب عصير برطقال ويقول حق ربعة (توني شارب عصير عوار قلب من الضاحية عالهبه)
وبجذي تكون خلصت الاستراحة على ان نلتقى فيكم الاسبوع الياي .. يوم الاحد
